പട്ടിക്കാട് : ജാമിഅ: നൂരിയ്യ 2022 സംസ്ഥാന തല ദർസ് ഫെസ്റ്റിൽ കീരീടം ചൂടി ആലത്തൂർപടി ദർസ്. കോവിഡ് പ്രതിസന്ധികൾക്കിടയിൽ 15 ഇന ജനറൽ മത്സരങ്ങളായി ചുരുക്കിയ ഫെസ്റ്റിൽ 400 ൽ പരം ദർസുകൾ മാറ്റുരച്ചു. 119 പോയിൻ്റ് നേടിയാണ് ആലത്തൂർപടി ദർസ് ഒന്നാം സ്ഥാനം കരസ്ഥമാക്കിയത്. ഫെബ്രുവരി 5, 6 തീയ്യതികളിൽ പട്ടിക്കാട് ജാമിഅ: നൂരിയ്യയിൽ വെച്ചായിരുന്നു സംസ്ഥാന തല മത്സരങ്ങൾ നടന്നത്. ആലത്തൂർപടി ദർസ് വിദ്യാർത്ഥി സയ്യിദ് റഈഫ് ഹസനി കണ്ണന്തളി ഫെസ്റ്റ് കലാപ്രതിഭയായി തിരഞ്ഞെടുക്കപ്പെട്ടു.
97 പോയിൻ്റ് നേടി കോടങ്ങാട് ദർസ് , 57 പോയിൻ്റ് നേടി തലപ്പാറ ദർസ് യഥാക്രമം രണ്ടും മൂന്നും സ്ഥാനങ്ങൾ നേടി. ജാമിഅ: മുദ്ദരിസ് ളിയാഉദ്ദീൻ ഫൈസി മേൽമുറി വിജയികൾക്ക് കിരീടം സമ്മാനിച്ചു. മുഹമ്മദലി ശിഹാബ് ഫൈസി കൂമ്മണ്ണ ,പി. ഉമർ ഫൈസി മുടിക്കോട് , ഇബ്രാഹീം ഫൈസി തിരൂർക്കാട് ,അൽ ഹാഫിള് സയ്യിദ് ത്വാഹ ഫൈസി മണ്ണാർമല ,ഖാദർ ഫൈസി കുന്നുംപ്പുറം , മരക്കാർ സാഹിബ് പൊന്നാനി ,ശഫീഖ് ഹുദവി കാരക്കുന്ന് തുടങ്ങിയർ സമാപന സംഗമത്തിൽ സംബന്ധിച്ചു.

മേല്‍മുറി ; ആലത്തൂര്‍പടി ദര്‍സ് ഫെസ്റ്റിന് തുടക്കം കുറിച്ചു. ‘ശബ്ദം നിശബ്ദം കലയുടെ പോരാട്ട വീര്യം’ എന്ന പ്രമേയത്തില്‍ ദര്‍സ് സ്റ്റുഡന്റ് യൂണിയന്‍ (എ.ഡി.എസ്.എ) സംഘടിപ്പിക്കുന്ന മെഹറജാന്‍ 2K22 ദര്‍സ് ഫെസ്റ്റ് മുദരിസ്സ് സി.കെ മുഹമ്മദ് അബ്ദുറഹ്്മാന്‍ ഫൈസിയുടെ അദ്ധ്യക്ഷതയില്‍ അല്‍ ഹാഫിള് സയ്യിദ് റാജിഹ് അലി ശിഹാബ് പാണക്കാട് ഉദ്ഘാടനം ചെയ്തു. മൂന്ന് ദിവസങ്ങളിലായി നീണ്ടുനില്‍ക്കുന്ന ദര്‍സ് ഫെസ്റ്റില്‍ നൂറിലധികം മത്സര ഇനങ്ങളിലായി ഇരുനൂറില്‍ പരം മത്സരാര്‍ത്ഥികള്‍ മാറ്റുരക്കും. മുഹമ്മദ്‌ ശരീഫ് ഫൈസി, മുഹമ്മദ് ശഫീഖ് ഫൈസി, ഉവൈസ് അശ്‌റഫി ഫൈസി, തമീം ഹുദവി, സൈനുദ്ദീന്‍ ഉളവട്ടൂര്‍, മുബഷിര്‍ ഓമാനൂര്‍, റാഷിദ് ഒറവമ്പുറം, ഹാഫിള് ഉബൈദ് ഫൈസി, ഹാഫിള് മുനീര്‍ ഹുദവി തുടങ്ങിയവര്‍ സംബന്ധിച്ചു.

കോവിഡ് 19 ന്റെ പശ്ചാതലത്തിൽ ദർസ് തുറന്ന് പ്രവർത്തിക്കാൻ അസൗകര്യമുള്ളതിനാൽ ഓൺലൈൻ വഴി ക്ലാസ് ആരംഭിക്കും. പാഠ്യ – പാഠ്യേതര വിഷയങ്ങളിൽ പഴമ നിലനിർത്തിക്കൊണ്ട് തന്നെ കാലിക മാറ്റങ്ങളുമായി മുന്നോട്ടുപോകുന്ന ആലത്തൂർപടി ദർസ്, വിദ്യാർത്ഥികളുടെ മത ഭൗതിക വിദ്യാഭ്യാസത്തിന് മുടക്കം വരാതിരിക്കാൻ മികച്ച സംവിധാനങ്ങളാണ് ഒരുക്കിയിട്ടുള്ളത്.

24/05/2021 രാവിലെ 10 മണിക്ക് കോഴിക്കോട് ഖാളി സയ്യിദ് അബ്ദുന്നാസർ ഹയ്യ് ശിഹാബ് തങ്ങൾ ഓൺലൈൻ ക്ലാസ് ഉദ്ഘാടനം നിർവ്വഹിക്കും.
സയ്യിദ് ഫസല്‍ ശിഹാബ് തങ്ങള്‍ പ്രാർത്ഥന നിർവ്വഹിക്കുന്ന സംഗമത്തിൽ ബഹു ഉസ്താദ് അദ്ധ്യക്ഷത വഹിക്കും

ഇന്നാണ് അഭിമാന സുദിനം. നൂറ്റാണ്ടിലേറെ പഴക്കമുള്ള ഞങ്ങളുടെ മഹല്ല് പള്ളി (മേൽമുറി ആലത്തൂർപടി) വൻ വിപുലീകരണത്തിന് ശേഷം ഇന്ന് തുറക്കും. AD 1886 (ഹിജ്റ 1302-1303) ൽ റജിസ്റ്റർ ചെയ്യപ്പെട്ട പള്ളിയിൽ ഹിജ്റ 1322 ലാണ് ജുമുഅ: ആരംഭിച്ചത്. മൂന്ന് വിപുലീകരണം മുമ്പ് നടന്നിട്ടുണ്ട്. ഏറ്റവും വലിയ വിപുലീകരണം ഇപ്പോഴാണ് നടന്നത്. രണ്ടായിരത്തിലധികം മഹല്ല് നിവാസികളും ആയിരത്തിലധികം വിദ്യാർഥികളും നൂറ് കണക്കിന് മുതഅല്ലിമുകളും നിരവധി യാത്രക്കാരും അന്യദേശ തൊഴിലാളികളും ഇവിടെ ജുമുഅ: യിൽ പങ്കെടുക്കുന്നു. വിദ്യാഭ്യാസ സ്ഥാപനങ്ങളുടെ കേന്ദ്രമാണ് മേൽമുറി ആലത്തൂർ പടി. പള്ളിയാകട്ടെ പുകൾപെറ്റ ദർസ് കേന്ദ്രവും. ഇവിടെ പഠിക്കുകയോ പഠിപ്പിക്കുകയോ ചെയ്തവരാണ് പ്രമുഖ പണ്ഡിതരിൽ അധികവും. ഖിലാഫത് നായകൻ നെല്ലിക്കുത്ത് ആലി മുസ്ലിയാർ, അരിപ്ര മൊയ്തീൻ മുസ്ലിയാർ, എൻ്റെ പിതാമഹൻ കാടേരി ഹസൻ മുസ്ലിയാർ, കിടങ്ങയം ഇബ്രാഹീം മുസ്ലിയാർ, എൻ്റെ മാതാമഹൻ അബ്ദുറഹ്മാൻ ഫള്ഫരി എന്ന കുട്ടി മുസ്ലിയാർ, കെ.കെ. അബൂബക്ർ ഹള്റത്, ഒ.കെ. സൈനുദ്ദീൻ മുസ്ലിയാർ, കെ.സി. ജമാലുദ്ദീൻ മുസ്ലിയാർ, കിടങ്ങഴി അബ്ദുറഹ്മാൻ മുസ്ലിയാർ, എ.പി. മുഹമ്മദ് മുസ്ലിയാർ കുമരംപുത്തൂർ, എൻ. അബ്ദുറഹ്മാൻ മുസ്ലിയാർ കുമരംപുത്തൂർ, കാപ്പിൽ ഉമർ മുസ്ലിയാർ, പൊന്മള ഫരീദ് മുസ്ലിയാർ, നെല്ലിക്കുത്ത് ഇസ്മാഈൽ മുസ്ലിയാർ, എൻ്റെ ഗുരുവും അമ്മാവനുമായ ശൈഖ് അൻവർ അബ്ദുല്ല ഫള്ഫരി എന്നിവരെല്ലാം ഇവിടെ ദർസ് നടത്തിയിട്ടുണ്ട്. ഇരുപത് വർഷമായി ബഹു. സി.കെ. അബ്ദുറഹ്മാൻ ഫൈസി ഖാളിയും മുദരിസുമായി തുടരുന്നു. ഇരുനൂറിലധികം വിദ്യാർഥികൾ ദർസിൽ പഠിക്കുന്നുണ്ട്.

Courtesy: Usthad Ziyaudheen Faisy – FB Post

പട്ടിക്കാട് ജാമിഅ: നൂരിയ്യ: അറബിയ്യ: യുടെ വാർഷികത്തോടനുബന്ധിച്ച് ആലത്തൂർപ്പടി ദർസ് പുറത്തിറക്കുന്ന അറബിക് പ്രസിദ്ധീകരണം “അദ്ദർസ്” പ്രകാശിതമായി. 23/03/21 ചൊവ്വാഴ്ച്ച നടന്ന മലപ്പുറം ജില്ല ജംഇയ്യത്തുൽ മുദരിസീൻ ശിൽപശാലയിൽ വെച്ച് ശൈഖുൽജാമിഅ: ആലി കുട്ടി ഉസ്താദ് ഇബ്രാഹീം ഫൈസി തിരൂർക്കാടിന് ആദ്യ പതിപ്പ് നൽകി പ്രകാശന കർമ്മം നിർവ്വഹിച്ചു .
കാലികവും കർമ്മശാസ്ത്രവും വിശകലന വിധേയമാക്കുന്ന അദ്ദർസ് ഇത്തവണ കൊറോണാമാരിയും സമകാലിക മസ്അലകളും ചർച്ച ചെയ്യുന്നു . ആകർഷണീയവും ആശയസമ്പുഷ്ഠവുമായ “അദ്ദർസ് – 21 ”
ഭാഷാ സ്നേഹികൾക്കും പണ്ഡിത വിദ്യാർത്ഥികൾക്കും ഒരുപോലെ ഉപകാരപ്രദമാകുമെന്നാണ് പ്രതീക്ഷ.